mir sitzed i eusem lieblingsinternetkafi in kuta und warted, bis mer choend an flughafe fahre. ja, eusi toll, lang reis isch definitiv ines paar stunde z end, und mir choends eus gar noed vorstelle, dases jetzt wuerkli sowiit isch.

die letscht wuche, wo mer im alam batu verbracht haend, isch en absolute traum gsi. das hotel isch eifach de hammer. i de bungalow haetted mer also grad choene iizieh. d alag ich au en traum gsi, aber s beste sind eiduetig d luet gsi. d doris und de ingo, wo das ganze leitet, sind mega zwaeg und ufgstellt. das nur maximal 22 gaest haet, haend mer nach 2 stund all scho kaennt und es isch eifach nur mega witzig und total famliaer gsi.

d simi haet natuerlich d glaegeheit packt und grad 8 tauchgaeng i dene 4 taeg anetetscht und d cloede haet nacheme schnuppertauchgang sogar s open water brevet gmacht! also andi und cyril, ihr wuessed, was ihr z tue haend. ab jetzt gits kei staedtereise meh, sondern nur no tauchferie leider haets kei mantas und anderi grossi sache gha, aber d simi haet immerhin en schlafende babyhai gseh und susch wimmleds det nur so vo chline herzige sache wie nacktschnecke, garnele, chraebsli und so wiiter. en traum. (aninchen: tauche, los!)

d luet im alam batu sind so toll gsi, das mer eus a eusem letschte abig sogar gemeinsam mit arak zuegschuettet haend, bis mer am morge am halbi 2 zunere live-version vo hotel california im ess-saal umetanzt sind. also det sind mer sicher noed s letscht mal gsi, und mir choend eu allne nur empfehle, det au mal id ferie z gah… (alam-batu.ch)

jetzt hocked mer no die letschte stund uf indonesischem bode ab, aber so unagnehm wirds sicher noed, jetzt goend mer naemli grad no id massage.

mir freued eus sehr, eu alli wieder z gseh, eu d foeteli z zeige und z verzelle, was mer da us zit und platzgruend noed haend choene schribe… die meiste werded sicher a de simi ihri party cho, ODER??? das isch ja scho i wenige stund und wird sicher au mega witzig. d simi freut sich sehr uf es richtigs stuck fleisch und d cloede uf ihres heidelbeerjoghurt.

i dem sinn: viele dank, das ihr eusi reis immer so flissig mitverfolgt haend, es haet uh spass gmacht, fuer eu alli z schriibe!

sampai jumpa lagi

simi & cloede

eusi schiffstour durch nusa tenggara bis nach flores isch de absoluti hammer gsi (anina: bueche, jetzt, los!)

nachdem mer am letschte maentig quer ueber d insle zu eusem boot gfahre worde sind, haend mer eusi kabine namens „salmon“ bezoge. und es isch die best kabine ufem boot gsi, mit eigenem balkon. usserdem isches die einzig gsi, wo d better quer gstande sind, das heisst, mir sind bi starkem wellegang eher ufe und abe grutscht als nach links und rechts. naturlich isch sie aber dasmal wuerkli noed viel groesser gsi als e briefmarke. 2qm hoechstens.

d crew isch de hammer gsi, speziell de choch. was de eus amel vorgsetzt haet… so feins indonesisches aesse haend mer noed oft gha. chli viel riis halt, aber das isch ja gsund.

mit de luet ufem boot haend mers au guet gha, natuerli sind mer wieder die einzige schwiizer gsi, aber da mer ganz e netti familie us lindau am bodesee kaenneglernt haend, haend mer mit dene au choene schwizerduetsch rede.

eusi taeg sind praegt gsi vo aesse, suennele, schorchle und schlafe. de wellegang isch ertraeglich gsi, nur uf gwuesse passage zwuesche de insle isches amel chli ruch worde. aber keis problem fuer eus gstandeni seebaere… oder eher seegurke?

am 3. tag sind mer denn in komodo acho. es haet chli wenig guides gha, drum haet euses ganze schiff, immerhin 30 luet, i einere gruppe muesse loszottle. das haet eus scho noed so passt, will mer denkt haend, i sonerer grosse gruppe gseht mer eh nuet. d claudia haet grad gseit, „muesch luege, mir gsehnd kein einzige dragon“, da sind eus no zmitzt im dorf zwei vor de fuess glaege. scho sehr iidruecklich, die riese viecher… vorallem wenns so naech sind

mir haend denn e wanderig uf de insle gmacht aber leider keine meh gseh. defuer isch d landschaft det sehr idruecklich. bali und lombok sind no recht gruen und fuecht, aber uf dere insle det haet d sunne glaub jedes graesli verbrennt. es haet zum teil usgseh wie in afrika.

am naechste tag haend mer namal dragon watching in rinca gmacht, au en teil vom komodo-nationalpark. und det haend mer nach wenige meter ufghoert zelle. ueberall sind die dragons umeglaege, me isch schier drufgstande. euse guide uf rinca isch defuer chli komisch gsi, er haet naemli keis einzigs wort englisch verstande und wenn mer ihn agsprche haet, haet er eim eifach ignoriert. am abig isch eus au ufgange, warum… de luet vom nationalpark sind a dem tag d guides usgange, und da haends eifach en fischer gno, wo grad det gsi isch, haend em en stecke id haend druckt und er haet eus denn uf de insle umegfuehrt. de rueckweg haet er au nueme gwuesst, drum isch denn au de leiter vo eusere tour ploetzich bi eusere gruppe gsi und haet eus grettet

am namittag haend mer meistens en schnorchelstop bimene schoene strand oder ufere chline insle gmacht. die straend sind au de hammer gsi. tuerkises wasser, wisse sand und im hintergrund die „afrikanisch savanne“. und s schnorchle erst… viele viele bunte fische.

gester isch no de indonesisch nationalfiirtig gsi, und mir haend grad en stop uf de insle moyo gmacht, zum en wasserfall aluege. scho vo wiitem haend mer die iiheimische am strand ghoert lache und schreie. mir haend eus ja scho s schlimmste vorgstellt, dass die hahnekaempf mached oder susch oepis komisches, aber bim naechergah haend mer gmerkt, dass sie seilziehnd sehr herzig isch das gsi. eusi wiisse manne vom schiff haend die chline indonesier innerhalb vo wenige sekunde scho besiegt gha.

jaja, schoen isches gsi. huet inere wuche choemed mer au scho wieder hei. im moment hocked mer no in senggigi uf lombok, fahred aber huet no mit de faehre zrugg uf bali und verbringed denn det eusi letscht wuche i eusem lang ersehnte luxushotel. viel wird nueme passiere, aber mir melded eus nach moeglichkeit.

und jetzt: ab ufs schiff (zum letzte mal)!

simone & claudia

jaja, mir sind im drogeparadies glandet. natuerli noed absichtlich. vorgester sind mer recht gschockt gsi, wo mer bi jedem restaurant und guesthouse uf de insle folgends farbefrohs schild gseh haend: „we have fucking fresh magic mushrooms, your ticket to heaven!“ und es benaehmed sich au all da, als waereds uf pilzli. oder ecstasy eher. gester sind mer naemli a de grosse party im rudy’s gsi und es isch abgange wie es zaepfli

eus haends bsunders die coole type hinter de bar recht atah. DAS nennt mer gaesteanimation… die bewegige choend mer eu gar noed beschriiibe, uf jede fall isches sehr lustig gsi. mir haend denn au no zwei duetschi kaenneglernt, de alex und de jonas, und es isch en lustige abig worde. de alex haet glaub au irgendoeppis gspickt. aber huet haet er sich nueme moege erinnere. es haet gwimmled vo chline halbnackte indonesier, bsoffne halbnackte englaenderinne und grabschende hollaender. euse vermieter isch au no ufkruezt und er haet eus denn am morge am 4i verzellt, warum all indonesische chatze nur stummelschwaenz haend. miiiiir haend ja mitem schlimmste gestaendnis grechnet, aber er haet gmeint, die choemed so uf d welt. ah ja.

es isch also en uesserst guenstige abig worde fuer eus. nacheme pitcher vodka sprite, wos eus vergaesse haend z verrechne (selber tschuld, nur no meh droge neh) haend mer no je 30’000rp fuer 2 jungle juice usgeh, das heisst, fuer 3.50 sind mer recht guet unterwegs gsi. zum glueck haet huet morge d sunne noed so gschune…

mit de andere 2 nachtschwaermer haend mer am strand abgmacht. de alex isch zwar nuechtern nur bedingt agnehmer als bsoffe, will er dauernd „weisste“ seit. woner denn die chline herzige wasserschildchroetli vo de ufzuchtstation da uf de insle als „chillige tiere“ bezeichnet haet, ischer bi eus endgueltig unedure gsi. ehemaligi kiffer verrated sich immer.

ansonste aessed mer da sehr guet (tuuuunaaa…. aaaah), ligged stundelang i de pralle sunne und reged eus ueber euse uebertuereti bungalow uf. s wasser isch da chli es problem. erstens isches genauso salzig wies meer und zweitens chunnt eigentlich nie wasser use. oder nur, wenn mer de duschhahne maximal 50cm uber em bode hebt. das heisst, mir chrueched i eusem tolle offene bad uf de chnue am bode ume, zum d haar waesche. aber susch ischer super

@ temi mugge: mir findets wuerkli super da, und im moment isches glaub i de schwiz gfoehrlicher als bi eus… chasch das am grosi saege

@ cyril: na du kroat, freut eus sehr, dass du au schoeni ferie gha haesch. chli churz, findsch noed?

@ andi: zum glueck sind mer noed so lang gfahre, dass d cloede de fahrstil choennt aneh

@ aenscha: dir wuessed mer jetzt denn bald nueme was schribe, aber mir freued eus immer sehr ueber dini herzige iitraeg… und mir haend fascht chli es schlechts gwuesse, das mir da so guets wetter haend

also ihr suesse, das wird de letzt iitrag sii fuer e laengeri ziit. am maentig morge fahred mer mit dem hoelleschiff uf lombok und bestiged det s andere schiff, wo eus i 5 taeg dur d insle bis nach flores und wieder zrugg wird schippere. ufem weg mached  mer halt in komodo, wo mer hoffentlich es paar vo de dragons werded gseh und bi diverse andere inseli, zum schorchle und so wiiter. mir hoffed uf guets wetter und weniger wellegang… und mir melded eus vorussichtlich am naechste samstig wieder.

schiff ahoi!

d land-und-bald-wasserratte simone und claudia

nach eusem trip uf d insle haend mer namal e nacht im hotel sorga in kuta verbracht und haend es letschts mal de absolut miesischti zmorge vo de ganze ferie gha. nachher haend mer eus zum treffpunkt fuer de transfer uf gili tranwangan gschleppt. uebrigens de laengst weg, wo mer je euse rucksack haend muesse traege. also noed soooo wiit.

de bus isch puenktlich (das heisst 30 minute zpat) losgfahre. nach 1.5 stund sind mer a de ostkueste vo bali in padangbai acho und eus isch en lunchstop ufzwunge worde. zwei stund spaeter haet entli de transfer ufs schiff agfange, wo eus hett soelle ueberefahre. sie haend det in padangbai es tolls neus dock baut, aber will s wasser det halt glich nur oeppe en meter tuef isch, cha glich keis groessers schiff anefahre. mir 80 luet sind also mitere nussschale i oeppe 4 etappe ufs groessere boot ueberegfahre worde. das isch scho mal lustig gsi.

ufem schiff haend mer eus ufs sunnedeck gsetzt, wo praktischerwiis mit sand ufgfuellt worde isch. und denn isch die hoellefahrt losgange. zerst no ganz gmuetlich sind mer de kueste vo bali in norde ufegschippered. und denn haet de kaeptn de kurs gewechsled und richtig lombok gstuered. und det isches losgange. riese welle sind ploetzlich cho, und zwar wuerkli riese welle. euses schiff haet also meh als eimal bedenklich schlagsiite gha. und obe ufem sunnedeck sind d luet ufem sand hi und her grutscht. mir sind denn sicherheitshalber abe go sitze. es haet natuerlich noed lang duured, da sind die erste scho ueber de reling ghanged und haend fischli gfuetered. es isch e eher weniger schoeni ueberfahrt gsi, cha mer saege. mir freued eus scho mega uf eusi 5 taegig komodo tour, wo am maentig afangt

leider isches scho dunkel gsi, wo mer uf gili trawangan acho sind. wieder haets en tolle nusschaletransfer as land geh und mir sind froh gsi, sind mer entli ab dem kahn dune gsi. de isch naemli au im windstille wasser vor de insle bedenklich schief im wasser gstande…

uf de insle haend mer eus miteme duetsche es rosswaegeli gmietet, da gits naemli kei auto und kei toeffli, halleluja. er haet eus recht lang umegfahre, aber die meiste unterkuenft sind full gsi oder eifach ueberrisse tuer. isch halt hochsaison… schliesslich haend mer eus fuer en meeeega schoene bungalow entschiede, wo zwar chli ueber eusem plante budget liegt, aber wo mer det inegluegt haend, haend mer eus grad verliebt. soooo schoen! mit terasse, det druf haends eus vorher s fruehstueck serviert, und mit offenem bad. es isch toll.

trawangan haet chli de ruef vonere partyinsle, und gester isches i de strandbar scho chli abgange. mir haend au en doppelgaenger vom matt gseh und de eint oder ander touri wiedertroffe, wo mer bis jetzt uf de reis kaenneglernt haend. dezue muess mer no amerke, dass d prise halt scho unglaublich tuef sind, es isch also fascht billiger, en drink z neh, als es bier.

und jetzt goend mer an strand! mal luege oeb mer da wuerkli so guet cha schnorchle wie all saeged.

guet luft

claudia & simi

@ aenscha: wasserhydrante haets da kei
@ chrigi: viel spass in sharm… haesch der das guet ueberleit, im august uf aegypte?

nach ubud sind mer wiiter richtig norde gfahre. nacheme zwueschestop am mount bratan und am dazuegehoerige see sind mer aber rasch wieder is autoeli gfluechtet… det haet echt jede oepis z verchaufe gha. ufem weg an see sind mer no vonere alte frau ueberrascht worde, wo eus uf de strass anegwunke haet. nichtsahnend haend mer ghalte und bevor mer eus haend choene wehre, haet sie eus nasse riis uf d stirn gchlaebt, bluemli hinter d ohre gsteckt und sones choerbli mit bluete und raeucherstaebli ufs armaturebrett gstellt. denn haet sie zuckersuess glaechled und gseit: „money.“ mir sind natuerlich voellig ueberrumpled gsi und haend ihre denn es paar tusig rupieh geh. natuerli noed die horrende 10’000 wo sie gern hett welle.

ine polizeikontrolle sind mer au no cho. mir haend eus scho gseh schmiergelder zaemechratze, aber de netti herr isch sehr hilfsbereit gsi und haet eus luuter gueti tips mit uf de wiiteri weg geh. de wuerd lieber mal luege, dass sini landsluet chli astaendiger fahred.

im norde sind mer richtig lovina gfahre, s zweite eher touristische gebiet in bali. irgendwo anere chruezig haet eus denn eine ufeme toeffli es visitechaertli durs fenster geh vo irgend ere unterkunft det. nach es paar minute wiiterfahrt haend mer denn gmerkt, das er eus tatsaechlich det ane vorusfahrt. mir sind denn halt mal hinenahgfahre und s chline hotel isch wuerkli mega suess gsi und direkt am strand. de strand isch denn au zu eusem verhaengnis worde. es haet oeppe glich viel strandverkauefer wie in kuta, nur dases en bruchteil vo de touris gha haet. das git also gschaetzti 25 verkaeufer pro tourist und all waend, das mer ihne ihri ganz war abchauft. jede haet denn no e trurigi gschicht vo chranke chind, gstorbene manne und so wiiter, und mer fuehlt sich schnell mal verantwortlich fuers glueck vo allne balinese, will all immer saeged: „for good luck, please.“

mir haend am schwarze strand vo lovina au no zwei oesterricher troffe, d lisa und de michi, die sind scho mit eus uf de bromotour gsi. d welt isch halt es dorf. mit dene haend mer denn es laessigs nachtaesse gha, sogar mit wii und schoggimousse und mer wird sich vorussichtlich uf de gilis wieder treffe, eusem naechste ziel.

morn am 10ni gahts los richtig gili trawangan, zerst mitem bus zum faehrhafe in padangbai und denn mitem schiff ab uebere. huet haend mer eusi erst malariatablette gno. uf de gilis sind mer denn bis am maentig morge und denn gahts wiiter uf eusi schiffstour nach komodo und flores. aber uf de gilis werded mer sicher no d moeglichkeit ha, eu chli z schribe.

bis bald!

die wahnsinnige ueberholer

claudia & simone

s schlimmste sind natuerli die toeffli, wo ein die ganz zit vo links und rechts ueberholed. uf jedem toeffli staht denn au no es chind vornedruf, wo mer scho gsehnd dur d luft fluege… allzu defensiv doerf mer aber au noed fahre, susch wird hine wieder ghuuped. d claudia haet genau die richtig mischig us vorsicht und ruecksichtslosigkeit gfunde, demit mer eus im balinesische verkehr choend behaupte. augen zu und durch isch au da e gueti devise (wie so oft), und am beste eifach noed hintereluege. es interessiert sich da eh niemer fuer das, was hine isch, sondern nur fuer das, was vorne passiert. d strasse sind au nur sporadisch agschribe und d doerfer ueberhaupt noed, es isch also immer chli es rate, wo mer echt grad isch.

ubud isch sooo herzig… und leider genauso es shoppingparadies wie kuta. nur das da d laede no chli schoener sind und d kafis no chli die bessere chueche haend… hmmm. es haet traumhaft schoeni hotel und all paar meter es spa… waer also mal e destination zum sich eifach vo chopf bis fuess verwoehne z lah.

mir haend e chlini unterkunft binere familie gfunde, wo 2 zimmer vermietet, de huusherr isch au grad de chef vom quartier und haet eus mitem badtuechli um de buuch herzlich empfange.

im heilige affewald sind mer au gsi (sacred monkey forest), es isch zwar meh e chlini asammlig vo gruenzueg gsi als en wald, aber nachem dschungel sind mer eus au a groesseri dimensione gwoehnt… de wald isch vo affe bevoelkered, me staht schier all paar meter uf eine druf. herzig sinds, und es wunder, sind noed all fett, sie watet bis zu de huefte i verdruckte banane, wonene d touris kilowiis aneruered.

fuer huet abig haend mer tickets fuer en legong-tanz kauft, denn hetted mer au wieder chli kultur gha. und morn gahts wiiter quer ueber d insle bis nach lovina.

@aenscha: hehe, du schinsch im moment die flissigst laeseri z sii… mir freued eus natuerli, wenn mer dich choend unterhalte. und ufs buech also au… wird sicher spannend

also ihr liebe, mir lueged jetzt mal, oeb euse huusherr agleit isch und mached eus denn fuer de tempeltanz am abig parat.

tschuessli und kuessli

simi & claudia

mir lueged mal wiiter, irgendwo wirds scho es autoeli fuer eus ha, sie ruehreds eim au da na. mietpris pro tag: oeppe 12 stutz.

susch haend mer wie immer noed viel gmacht… mir haend en neue fruend gfunde da, und zwar de made wo eus de sunneschirm und de liegestuehl vermietet. am morge winkt er eus scho vo witem am strand, wuescht de stuehl ab und verschiebt en fuer eus, bis er perfekt staht. und wenn mer is wasser goend, luegt er uf eusi sache als waereds sini eigene. gester abig haet er eus voller bewunderig agluegt, will mer de ganz tag i de knallsunne glaege sind ohni au nur en roetliche schimmer devoztraege. daylong 50 sei dank

euse naechst stop wird ubud sii, sone kuenstlerstadt im inselinnere. det versueched mer mal no chli balinesischi kultur mitueberzcho, das isch da i de tourifalle kuta noed wuerkli moeglich. da muend mer nur immer ufpasse, das mer noed uf die gflochtene choerbli us palmeblaetter ufestoend, wo mit fruecht, riis und guezli gfuellt sind, zum d goetter besaenftige. die stoend da vor jedem huusigang und susch a praktische stelle.

eusi hippie-usruestig haend mer gester au no chli vervollstaendiged. es git da so laessigi hose…

so, und jetzt goend mer ab an strand. mir hoffed, das mer eu morn abig vo ubud mal choend schribe, wie s fahre uf de linke siite so isch…

liebi gruessli

claudia & simone

also aninchen, en guete tip… nimm denn gnueg muenz mit wenn uf bali gahsch. es isch natuerlich alles immerno dreckbillig… bsunders d markesache, gell. hawaii haet sin erste platz als shoppingparadies da uf de erste meter wieder verlore. und silber verchaufeds au a jedem egge zu prise wo eim zum bruele bringed.

huet mached mer defuer en strandtag. iicremt mitem schutzfaktor 50 ligged mer jetzt denn grad id sunne und probiered, eusi wiise streiffe a die neukaufte bikinis aazgliche. am mittag gits denn wieder en riese fruchtteller fuer 1.40.- und denn am abig namal en teller mie goreng fuer 2.80.-

wie ihr gsehnd, mir gnuessed eusi „ferie i de ferie“ sehr

liebi gruessli und bis bald

„wisswurm 1 und wisswurm 2, bald brunbraennti beach-babes“

simi & claudia

am andere morge haend mer eus parat gmacht zum wiiterreise. de gunung bromo isch euses ziel gsi , im oste vo  java. das isch en relativ chline vulkan, aber de sunneufgang seg schins eimalig. imene buesli vom reisebuero sind mer losgfahre , mir 2 und no 8 anderi traveller oeppe i eusem alter, us ganz europa. nach 2 stund oeppe isch de fahrer usgstige… „flat.“ haet er nur gseit. er haet also  am strasserand muesse de reife wechsle. sind scho froh gsi haeter ueberhaupt eine gha. und es isch es lustigs bild gsi, wie er sich det abgmueht haet und mir haend all zuegluegt. nach 30 minute isches wiiter gange. churz drufabe haet vorne bim motor oepis sehr komisch toent. und es isch au  immer schlimmer worde…  er haet denn en fachmaennische blick drigworfe und chli dra umegschruebled, aber nach wenige meter uf de strass isch das gruesch wieder da gsi. also haend mer  namal en zwueschestop inere garage muesse mache und de keilrieme wechsle.

d fahrt isch uh lang gange und es isch mega heiss gsi im bus will d klima noed gange isch. usserdem haend mer keis aug choene zuetue will de chli, herzig maa gfahre isch wie en besessene er haet glaub s gfuehl gha, euse bus seg es toeffli und haet knallhert alles ueberholt. zum bispiel ischer eifach amene grosse car nagfahre, wo en lastwage ueberholt haet, ohni das er fuere gseh hett… augen zu und durch. ah ja, es isch denn no prompt eine i eus inegfahre, zum glueck aber nuoed schlimm, am andere haets nur de spiegel chli verboge.

nach ewiglange 13 stund (jaja, mir fahred nie meh so lang bus, haha) sind mer in cemoro lawang acho. es isch iischalt gsi uf dere hoechi, mir haend mega hunger gha und gstunke haend mer au. und klebt. und susch alles wueschti.  bim ablick vom indonesische wc mit wasserbecki und schoepfchelle isch eus grad schlecht worde, aber  zum glueck haets e heissi duschi gha. die schoenst heiss duschi sit 3 wuche! nachem aesse im yoschis guesthouse (haet uebrigens usgseh wie e alphuette) sind mer is bett gheit. und 2.5 stund spaeter scho wieder use. am halbi 4i am morge haends eus abgholt und mit sehr klapprige jeeps  uf de  gipfel vom  gunung penanjakan ufegcharred. leider noed nur eus, sondern au no  oeppe 400 anderi touris. mir haend eus de platz hert muesse erkaempfe. de sunneufgang isch aber super gsi. wenn mer kei fremdi kamera vor de nase gha haet, haet mer une im tal de rauchendi gunung bromo gseh miteme andere vulkan vornedra , alles langsam erhellt vo de sunne. chalt isches gsi,  zum glueck haend mer choene daunejacke miete. haet sich also glohnt.

nach dem gedraenge sind mer wieder  mitem jeep direkt zum bromo gfahre. eus haend scho hunderti vo manne mit ponys erwartet. fuer 20000 rupie haet mer sich naemli vo somene arme viech choene de berg uf traege lah. mir haends natuerli s fuess gmacht. de schlimmst teil isch eh  am schluss gsi , 250 staegetritt de berg uf.  defuer isch d ussicht  super gsi und mer haet direkt in krater choene ineluege. jetzt isch eus au klar worde, warum all luet det obe eus haend welle so  grusigi blueme verchaufe, wo chli wie broccoli usgseh haend, das waered  opfergabe zum in vulkan ineruere.

nach dere  episode sind mer wieder is tal abegfahre worde und haend uf de bus nach denpasar, bali, gwartet. und gwartet. und gwartet. nach 2 stund ischer cho. uf de erst blick haeter so guet usgseh wie no keine vorher. nagelneu, kei viecher drin, aircon isch gloffe aber noed uf hochtoure. nur das die liebe asiate da im  car 5 sitz naebenand haend, wo mir nur 4 haend. d simi isch dem arme indonesier naebedra schier uf de chnue ghocked und d cloede isch defuer nur mitem halbe fuedli ufem sitz gsi. so sind mer denn  namal unertraeglichi10 stund gfahre, unterbroche nur vomene aessenshalt imene restaurant. det haend mer defuer die indonesisch variante vo chips entdeckt, frittierti cassava (tapiokawurzle). seeeehr fein!

in denpasar haend mer eus miteme duetsche es taxi teilt und sind nach kuta gfahre, tourihochburg in bali. mir sind is  hotel sorga gange, sehr huebsch, mit pool und was es no meh beidruckt haet, mit LAVABO!

jetzt sind mer also da in kuta und loend eus chli d sunne uf de buch schiine.  es haet noed so viel luet wie mer erwartet haetted, defuer isch jede zweit en surfer. d welle am strand sind au lustig, eus ziehts amel s bikini abe und am abig haend mer wuerkli ueberall sand gha… aehm.

mir blibed vorussichtlich es paar taeg da und kleided eus mal chli neu i, eusi alte shirts schmoecked immer no nach dschungelmoder und mir choemed eus sehr underdressed vor , wenn mer da umelaufed… und jezt gits znacht!

nichtsahnend haend mer eus uf de weg is superman’s gmacht, eis vo eusne lieblingsrestaurants in yogya. es haet grad langsam aagfange dunkel werde, im restaurant sind mer die einzige gaest gsi. im hintergrund haend mer immer so  komischi gruesch ghoert und zerst haend mer gmeint, es lost eine chli lut fernseh oder so. mir haend no dummi witz gmacht wills toent haet wie die tuefelsustribig bi „the exorzist“. mir haend denn welle bstelle und d simi haet denn de chef gfroegt, was das fuer en laerm das seg.

er haet denn relativ cool oepis vo „supernatural“ und „evil ghost“ verzellt, und mir haend denn us ihm usequetscht, das im huus hinter am restaurant en maa sit am namittag vomene boese geist besesse seg. es sind au uh viel luet det umegstande und er haet denn gmeint, de seg halt „very strong“ und so. und am besessene sini frau und sini chind sind huelend det uf de gass gstande.

uuh, eus isches chalt de rugge abegloffe. sind ja noed aberglaubisch oder so, aber die gruesch haetted er echt soelle ghoere… haend zerst denkt, es seg vilicht es chind oder e frau, aber woner gseit haet, es seg en maa, isch eus grad de lade abe. es haet wuerkli sehr supernatural toent… und gar noed schoen. halt wuerkli wie im film, usser das mer zum glueck halt noed verstande haend, was de so gschroue haet… mir haend denn natuerli noed so lust gha zum det aesse und de chef haet au gseit, er verstaht das sehr guet und mir soelled doch woanders go aesse.

soviel zu dem… hetted mer euses geistererlaebnis au no gha.

uebrigens haend mer vorher grad no eusi naechste taeg plant und mir sind jetzt definitiv am sunntig abig scho in bali. det blibed mer es paar taeg, goend dennno fuer e wuche uf lombok, bevor mer det eusi bootstour uf komodo started und die letscht wuche sind mer denn wieder in bali. am weekend bestiiged mer no en vulkan, allerdings en inaktive. no meh komischi erlaebnis bruched mer jetzt fuer de moment grad noed…

ghostly greetings

claudia & simone