mir sind uf gili trawangan, am paradies uf erde. aber mir haends au verdient.
nach eusem trip uf d insle haend mer namal e nacht im hotel sorga in kuta verbracht und haend es letschts mal de absolut miesischti zmorge vo de ganze ferie gha. nachher haend mer eus zum treffpunkt fuer de transfer uf gili tranwangan gschleppt. uebrigens de laengst weg, wo mer je euse rucksack haend muesse traege. also noed soooo wiit.
de bus isch puenktlich (das heisst 30 minute zpat) losgfahre. nach 1.5 stund sind mer a de ostkueste vo bali in padangbai acho und eus isch en lunchstop ufzwunge worde. zwei stund spaeter haet entli de transfer ufs schiff agfange, wo eus hett soelle ueberefahre. sie haend det in padangbai es tolls neus dock baut, aber will s wasser det halt glich nur oeppe en meter tuef isch, cha glich keis groessers schiff anefahre. mir 80 luet sind also mitere nussschale i oeppe 4 etappe ufs groessere boot ueberegfahre worde. das isch scho mal lustig gsi.
ufem schiff haend mer eus ufs sunnedeck gsetzt, wo praktischerwiis mit sand ufgfuellt worde isch. und denn isch die hoellefahrt losgange. zerst no ganz gmuetlich sind mer de kueste vo bali in norde ufegschippered. und denn haet de kaeptn de kurs gewechsled und richtig lombok gstuered. und det isches losgange. riese welle sind ploetzlich cho, und zwar wuerkli riese welle. euses schiff haet also meh als eimal bedenklich schlagsiite gha. und obe ufem sunnedeck sind d luet ufem sand hi und her grutscht. mir sind denn sicherheitshalber abe go sitze. es haet natuerlich noed lang duured, da sind die erste scho ueber de reling ghanged und haend fischli gfuetered. es isch e eher weniger schoeni ueberfahrt gsi, cha mer saege. mir freued eus scho mega uf eusi 5 taegig komodo tour, wo am maentig afangt 
leider isches scho dunkel gsi, wo mer uf gili trawangan acho sind. wieder haets en tolle nusschaletransfer as land geh und mir sind froh gsi, sind mer entli ab dem kahn dune gsi. de isch naemli au im windstille wasser vor de insle bedenklich schief im wasser gstande…
uf de insle haend mer eus miteme duetsche es rosswaegeli gmietet, da gits naemli kei auto und kei toeffli, halleluja. er haet eus recht lang umegfahre, aber die meiste unterkuenft sind full gsi oder eifach ueberrisse tuer. isch halt hochsaison… schliesslich haend mer eus fuer en meeeega schoene bungalow entschiede, wo zwar chli ueber eusem plante budget liegt, aber wo mer det inegluegt haend, haend mer eus grad verliebt. soooo schoen! mit terasse, det druf haends eus vorher s fruehstueck serviert, und mit offenem bad. es isch toll.
trawangan haet chli de ruef vonere partyinsle, und gester isches i de strandbar scho chli abgange. mir haend au en doppelgaenger vom matt gseh und de eint oder ander touri wiedertroffe, wo mer bis jetzt uf de reis kaenneglernt haend. dezue muess mer no amerke, dass d prise halt scho unglaublich tuef sind, es isch also fascht billiger, en drink z neh, als es bier.
und jetzt goend mer an strand! mal luege oeb mer da wuerkli so guet cha schnorchle wie all saeged.
guet luft
claudia & simi
@ aenscha: wasserhydrante haets da kei
@ chrigi: viel spass in sharm… haesch der das guet ueberleit, im august uf aegypte?
hey mädels
jez meld au ich mich mal wider. han mi wider uf de neusti stand bracht und all eui bricht mit freud und grossem nied dure gläse. isch halt scho huere cool was mir so alles erläbt wenn mir am reise isch. und indonesie het anschienend nöd mal soo wenig zbüte?!
mich freuts uf jede fall sehr wie gut ihrs hend und all die sache wo ihr zäme erläbed, das isch eifach grossartig.
ich bin ja no in kroatie gsi mit es paar jungs. isch eifach super gsi. isch zwar doch sehr heiss gsi für eusi verhältnis (bis zu 40 grad ohni klima welle zschlafe…unmöglich!). aber mir sind ja au nöd vil dä tag dur underwegs gsi… de usgang chan also nöd so schlecht gsi si. mir sind immer recht lang underwegs gsi und hend denn nachdem mir hei cho sind no bis zum sunneufgang gjassed. abr trotzdem simmer imr widr bi zite ufgstande und mit eusne luftis und übertürete sunneschirm am steistrand umegläge. und au “kulurell” hemmer eus nöd lumpe lah. sind immerhin im nationalparl krka gsi. also mir sind uf jede fall anegfahre hends schiff gno und hends denn für eus aghöggled!
miteme chline motorbötli simmer au mal no undrwegs gsi. sind zu wunderschöne buchte gfahre worde und hend eus a sehr gutem fisch erfreut, woner für eus uf dem bötli grilliert het. sind würkli grossartigi 10 täg gsi. verzell eu denn gern mal no meh details. mir sind sicher nöd sletscht mal det gsi.
so zimli aschlüssend bini denn is trainingslager uf davos. het also sehr gut tah nach de ferie. het eigentli chli erholig brucht aber de ganz alkohol widr useschwitze isch au nöd schlecht gsi. dafür tuet mir jez alles weh.
jaja das wär so chli bi mir glofe. han eigentlich nur schnell welle eu das mitteile, isch jez halt glich chli usführlicher worde. also ihr hübsche stinker, wünsch eu natürli witerhin ganz e erlebnisrichi reis und gnüssed all die abentür woner erläbed. vermisse eu also scho es biz!
kussis cyril
Ihr hübschä Stinker, ich will meeeehhhh *double-grins*
… ui ui ui, unglaublich spannend! Ihr sind momentan mini einzige Hoffnigsträger ad ussäwält….bin nämli scho sit es paar täg immer wieder am VWL lernä…und wännd usäluegsch…dänn rägnets! und wännd is Buech luegsch, rägnets au!! Drum luegi doch lieber gschwind is Internet und stell mir zu euiem Geschriebenä äs paar bunti Bildli vor!
Drum…schriiibed no meeeeehhhh;-)
Knuuudelknutsch*
änschi
hoi mini schätzis
schön, dass es eui nach dänä gfährlichä autotourä u.s.w no guet gaht:-) ich hoffä, ihr hend dä fahrstil nöd gad überno? gäll clöde!:-)
ich freui mi scho uf d’fötelishow vo eui. scho bald chömeder ja hei, nur no 16 täg! also ich freui mi. ihr eui viellicht chli weniger! vor allem münder eui dänn wieder ufs regäwätter istellä. i dä ledschdä täg hämmer ja i dä ganzä schwiiz mega überschwämigä gah! ich bin dä mittwuch wieder mal is vibes und was isch passiert; wo ich und d’kollegin händ wellä hei, isch dä ganz parkplatz vorem vibes unter wasser gsi. nöd eifach ä bitzli. nei mir händ muessä d’schue abziä und sin mit äm ganzä wädli im wasser standä. brrr mega chalt gsi. das bächli isch ja eigentli nöd gross döt. zum glück hani mis auto nöd döt parkiert! ja das weekend wirds aber besser mit äm wetter. ledschs wuchäänd bini no in paris gsi. mega schön gsi. han no d’mona lisa im louvre gseh und das ohni vorem louvre azstah!!!
hey also gnüssäds no und bis bald.
kussi andrea
guguuus zäme,
ha siit langem wieder mal d’ziit gfunde (oder gnoh), mich chli up-to-date z’bringe
isch also uuh spannend und mach grad luscht druf, au mal det ane z’gah!
he, wer isch dänn min doppelgänger gsi? woher isch de? hihi
sodeli, wiiterläse…
adééé,
m.