adrenalin pur

so, mir sind wieder zrugg vo eusere inselrundfahrt und sitzed wieder in kuta. haet also einigi nerve brucht, das autofahre… mir sind immerno ganz zittrig i de chnue. vo de chind, de huehner und de huend uf de strass haend mer ja scho verzellt, mittlerwiile sind mer sowiit, das eus d huend recht egal sind, es haet ja so viel. frontal entgegefahrendi lastwaege sind huet meh euses problem gsi. und ueberhole vor kuppe, i de kurve oder wenn mer noed fueregseht isch au keis problem, meistens trifft eh alles glichzitig zue. d toeffli ueberholed eim links und rechts, wenns wennd am strasserand ahalte (und das macheds oft) bremseds zerst und setzed denn no netterwiis fuer es paar sekunde de blinker. wo mer vorher de schluessel vom auto haend choene abgeh, sind mer scho froh gsi und nachher voellig erschoepft ufs bett gheit. vorallem d claudia, euse fahrer, hett jetz e massage meh als verdient.

nach ubud sind mer wiiter richtig norde gfahre. nacheme zwueschestop am mount bratan und am dazuegehoerige see sind mer aber rasch wieder is autoeli gfluechtet… det haet echt jede oepis z verchaufe gha. ufem weg an see sind mer no vonere alte frau ueberrascht worde, wo eus uf de strass anegwunke haet. nichtsahnend haend mer ghalte und bevor mer eus haend choene wehre, haet sie eus nasse riis uf d stirn gchlaebt, bluemli hinter d ohre gsteckt und sones choerbli mit bluete und raeucherstaebli ufs armaturebrett gstellt. denn haet sie zuckersuess glaechled und gseit: “money.” mir sind natuerlich voellig ueberrumpled gsi und haend ihre denn es paar tusig rupieh geh. natuerli noed die horrende 10’000 wo sie gern hett welle.

ine polizeikontrolle sind mer au no cho. mir haend eus scho gseh schmiergelder zaemechratze, aber de netti herr isch sehr hilfsbereit gsi und haet eus luuter gueti tips mit uf de wiiteri weg geh. de wuerd lieber mal luege, dass sini landsluet chli astaendiger fahred.

im norde sind mer richtig lovina gfahre, s zweite eher touristische gebiet in bali. irgendwo anere chruezig haet eus denn eine ufeme toeffli es visitechaertli durs fenster geh vo irgend ere unterkunft det. nach es paar minute wiiterfahrt haend mer denn gmerkt, das er eus tatsaechlich det ane vorusfahrt. mir sind denn halt mal hinenahgfahre und s chline hotel isch wuerkli mega suess gsi und direkt am strand. de strand isch denn au zu eusem verhaengnis worde. es haet oeppe glich viel strandverkauefer wie in kuta, nur dases en bruchteil vo de touris gha haet. das git also gschaetzti 25 verkaeufer pro tourist und all waend, das mer ihne ihri ganz war abchauft. jede haet denn no e trurigi gschicht vo chranke chind, gstorbene manne und so wiiter, und mer fuehlt sich schnell mal verantwortlich fuers glueck vo allne balinese, will all immer saeged: “for good luck, please.”

mir haend am schwarze strand vo lovina au no zwei oesterricher troffe, d lisa und de michi, die sind scho mit eus uf de bromotour gsi. d welt isch halt es dorf. mit dene haend mer denn es laessigs nachtaesse gha, sogar mit wii und schoggimousse und mer wird sich vorussichtlich uf de gilis wieder treffe, eusem naechste ziel.

morn am 10ni gahts los richtig gili trawangan, zerst mitem bus zum faehrhafe in padangbai und denn mitem schiff ab uebere. huet haend mer eusi erst malariatablette gno. uf de gilis sind mer denn bis am maentig morge und denn gahts wiiter uf eusi schiffstour nach komodo und flores. aber uf de gilis werded mer sicher no d moeglichkeit ha, eu chli z schribe.

bis bald!

die wahnsinnige ueberholer

claudia & simone