on the road again

so ihr liebe, eusi fuule taeg am strand vo kuta sind zaehlt. morn waennd mer gern es auto miete (wenn mer es fahrzueg findet, wo de name verdient) und i 4 taeg um d insle fahre. vorher sind mer grad es moeglichs mietobjekt go aluege, aber bi de inspektion vo de sicherheitsguert sind eus traene cho, einersiits vor lache, anderersiits vor verzwiiflig. d cloede haet denn gmeint, eigentlich choend mer froh sii, dases i dene chaerre kei airbag haet, will mer susch mit dene “sicherheitsguert” eh grad tot waer.

mir lueged mal wiiter, irgendwo wirds scho es autoeli fuer eus ha, sie ruehreds eim au da na. mietpris pro tag: oeppe 12 stutz.

susch haend mer wie immer noed viel gmacht… mir haend en neue fruend gfunde da, und zwar de made wo eus de sunneschirm und de liegestuehl vermietet. am morge winkt er eus scho vo witem am strand, wuescht de stuehl ab und verschiebt en fuer eus, bis er perfekt staht. und wenn mer is wasser goend, luegt er uf eusi sache als waereds sini eigene. gester abig haet er eus voller bewunderig agluegt, will mer de ganz tag i de knallsunne glaege sind ohni au nur en roetliche schimmer devoztraege. daylong 50 sei dank

euse naechst stop wird ubud sii, sone kuenstlerstadt im inselinnere. det versueched mer mal no chli balinesischi kultur mitueberzcho, das isch da i de tourifalle kuta noed wuerkli moeglich. da muend mer nur immer ufpasse, das mer noed uf die gflochtene choerbli us palmeblaetter ufestoend, wo mit fruecht, riis und guezli gfuellt sind, zum d goetter besaenftige. die stoend da vor jedem huusigang und susch a praktische stelle.

eusi hippie-usruestig haend mer gester au no chli vervollstaendiged. es git da so laessigi hose…

so, und jetzt goend mer ab an strand. mir hoffed, das mer eu morn abig vo ubud mal choend schribe, wie s fahre uf de linke siite so isch…

liebi gruessli

claudia & simone